யார் அழகி?!

அழகு என்பது என்ன?

ஒருவரது அழகு முகத்தில் இருக்கிறதா?உடலில் இருக்கிறதா?உள்ளத்தில் இருக்கிறதா?

ஒருவருக்கு அழகாக இருப்பது மற்றவருக்கும் அழகாய்த் தெரியுமா?

கீட்ஸ் சொன்னார்”அழகிய பொருள் என்றும் ஆனந்தம் தருவது” என்று.

கீட்ஸுக்கு அழகாகத் தோன்றுவது எனக்கும் தோன்ற வேண்டும் என அவசியம் இருக்கிறதா?

இந்தக் கேள்விகள் குறிப்பாக மனிதர்களின் அழகு குறித்தே இங்கு எழுப்பப்படுகின்றன!

நீங்கள் அழகென்று நினைக்கும் ஒரு பெண் எனக்கு அழகாகத் தோன்றாமல் போகலாம்!

பார்க்கும் பார்வையில்தான் வேறுபாடு.

ஒரு மன்னன் இருந்தான்.

அவனுக்கு கவிதை மிகவும் பிடிக்கும்;

கவிஞர்களைத் தேடித்தேடி அழைத்துக் கவிதை கேட்பான்.

ஒரு முறை பக்கத்து ஊரில் உள்ள ஒரு கவிஞரைப் பற்றிக் கேள்விப்பட்டு அவரை அழைத்து வரச் சொன்னான்.

ஆனால் அவர் இன்னும் ஓராண்டுக்கு எங்கும் செல்ல முடியாது என்று சொல்லி விட்டார்.

ஏனெனில் அவர் காதலிக்கும் பெண்ணுக்கும் அவருக்கும் ஓராண்டுக்குப் பின்தான் திருமணம். 

அதுவரை அவளை விட்டு வர விருப்பமில்லை;அவளை உடன் அழைத்து வரவும் முடியாது.

மன்னன் அவள் பேரழகியோ என எண்ணினான்

கவிஞரின் வருகைக்காக் காத்திருந்தான்..

கவிஞர் மனைவியோடு வந்தார்.

மன்னன் மிகுந்த ஏமாற்றம் அடைந்தான்.

ஏனெனில்”அவள் அப்படி ஒன்றும் அழகில்லை”

மன்னன் கவிஞரிடம் கேட்டான்”இவளையா பிரிந்து வர முடியாது என்றீர்கள்;அவ்வளவு அழகாக இல்லையே?”

கவிஞர் சொன்னார்”மன்னா!என் கண்களால் பாருங்கள்!”

காதல் மணம் செய்து கொண்ட பல இணைகளைப் பார்க்கும்போது எனக்கு இதுதான் தோன்றுகிறது.

என்ன பார்த்தான்(ள்) அவன்(ள்) அவளி(னி)டம் காதலில் விழுவதற்கு?

அவர்கள் கண்களால் நாம் பார்த்தால் தான் நமகு அது புரியும்!

எனவேதான் காதலுக்குக் கண்ணில்லை என்று சொன்னார்களோ!

அழகாயிருப்பது எப்படி?

அழுக்கில்லையென்றாலே அழகு வந்துவிடும்.

நான் சொல்வது உடல் அழுக்கல்ல; மன அழுக்கு!

கீழேயுள்ள அழகுக் குறிப்புகளைப் பாருங்கள் ---

உதடுகள் அழகாக இருக்க எப்போதும் அன்பான சொற்களையே பேசுங்கள்.

கண்கள் அழகு பெற மற்றவர்களிடம் இருக்கும்  நல்ல  பண்புகளையே பாருங்கள்.

அழகிய மெல்லிய உடல் அழகுக்கு உங்கள் உணவை பசித்தவர் களோடு பகிர்ந்து கொள்ளுங்கள்.

கேசப் பொலிவுக்கு தினம் ஒரு முறையாவது ஒரு குழந்தையின் கைகள் உங்கள் கூந்தலைத் தடவட்டும்.

நிமிர்ந்த நன்னடைக்கு,எப்போதும் நாம் தனியாக இல்லை என்ற நினைப்பு உங்களுடன் இருக்கட்டும்.

உதவும் கரம் தேவையென்றால் நினைவில் வையுங்கள் அது உங்கள் மணிக்கட்டுக்குக் கீழே இருக்கிறது என்பதை.வயது முதிர்ச்சி யடையும்போது,உணருங்கள் இரண்டு கரம் உள்ளது ,ஒன்று உங்களுக்கு உதவ,மற்றது அடுத்தவர்க்கு உதவ என்பதை.

ஒரு பெண்ணின் அழகு அவள் உடலமைப்பிலோ,அவள் அழகிய உடைகளிலோ,அவள் கூந்தல் அலங்காரத்திலோ இல்லை.

அது அவள் அன்பு உறையும் ஆன்மாவின் சாளரமான அவள் கண்களில்தான் இருக்கிறது.

இறைவனின் கண்களில் அனைவரும் அழகுதான்.அவன் அனைவரையும் விரும்புகிறான்.அவன் பார்வையில் ,அனைவருமே அழகானவர்கள்தான்

இந்தச் சிந்தனைகள் யாரிடம் பிறந்தன தெரியுமா?

ரோமன் ஹாலிடே என்ற படத்தில் அறிமுகமாகி,ஒரு மிகச் சிறந்த நடிகையாக மட்டுமன்றி ,ஒரு மிக நல்ல  மனித உயிராகவும் இருந்த ஆட்ரி ஹெப்பர்னிட மிருந்து!. 

அன்பே சிவம்!

ஒரு சிறுவன் கடவுளைச் சந்திக்க விரும்பினான்.அவரைச் சந்திக்க வெகு தூரம் செல்ல வேண்டும் என்பதை அவன் உணர்ந்திருந்தான்.எனவே ஒரு பையில் இரண்டு பாக்கெட் பிஸ்கட்டும்,ஒரு போத்தல் தண்ணீரும் எடுத்துக் கொண்டான்.வீட்டை விட்டுப் புறப்பட்டான்.

சிறிது தூரம் சென்றதும் ஒரு பூங்காவைக் கண்டான்.அதன் உள்ளே சென்றபோது அங்கு ஒரு வயதான பெண்மணியைக் கண்டான்.ஒரு இருக்கையில் அமர்ந்து அங்கு சுற்றித் திரிந்த புறாக்களைப் பார்த்துக் கொண்டிருந்தாள்.சிறுவன் அவள் அருகில் சென்று அமர்ந்தான். அவன் தன் பையிலிருந்து போத்தலை எடுத்துத் தண்ணீர் குடிக்க எண்ணினான்.அந்தப் பெண்ணைப் பார்த்தால் பசியுடன் இருப்பது போல் தோன்றியது.ஒரு பாக்கட் பிஸ்கட்டை எடுத்து இரு பிஸ்கட்டுகளை அவளுக்குக் கொடுத்தான்.அவள் அதை நன்றியுடன் வாங்கிக் கொண்டு அவனைப் பார்த்துச் சிரித்தாள்.

அவள் சிரிப்பது அழகாக இருந்தது.அதை மீண்டும் பார்க்க வேண்டும் என அவனுக்குத் தோன்றியது.அவளுக்குக் குடிக்கத்தண்ணீர் கொடுத்தான்.அதை வாங்கிக்கொண்டு அவள் மீண்டும் சிரித்தாள்.சிறுவன் மிக மகிழ்ச்சியடைந்தான். மாலை வரை இருவரும் அங்கேயே அமர்ந்திருந்தனர்—பிஸ்கட் சாப்பிட்டுக் கொண்டும், தண்ணீர் அருந்திக்கொண்டும்.

இருட்டத் தொடங்கியது.சிறுவன் வீடு திரும்ப எண்ணினான்.புறப்படும் முன் அந்தப் பெண்ணைக் கட்டிப் பிடித்து தன் மகிழ்ச்சியை வெளிப்படுத்தினான்.அந்தப் பெண்மணியும் தன் சிரிப்பின் மூலம் மகிழ்ச்சியை வெளிப்படுத்தினாள்.

வீட்டின் கதவைத் திறந்த சிறுவனின் தாய் அவன் முகத்தில் தெரியும் எல்லையற்ற மகிழ்ச்சியைக் கண்டாள்.அவள் கேட்டாள்”இவ்வளவு மகிழ்ச்சியாக இருக்கிறாயே,என்ன செய்தாய்?”

சிறுவன் சொன்னான்”இறு நானும் கடவுளும் சேர்ந்து பிஸ்கட் சாப்பிட்டோம்;நீர் அருந்தினோம்.இது வரை அப்படி ஒரு அழகான சிரிப்பை நான் பார்த்ததில்லை”

அதேபோல் அந்த வயதான பெண்ணும் எல்லையற்ற மகிழ்வுடன் வீடு திரும்பினாள். அவள் மகன் அவள் முகத்தில் தெரியும் அமைதியையும், ஒளியையும் பார்த்துக் கேட்டான் ”இவ்வளவு மகிழ்ச்சியடைய இன்று என்ன செய்தீர்கள்?”

அவள் சொன்னாள்” இன்று கடவுள் எனக்குப் பிஸ்கட்டும் ,தண்ணீரும் அளித்தார். இருவரும் சேர்ந்து அமர்ந்து சாப்பிட்டோம்.தெரியுமா!அவர் நான் நினைத்ததை விட மிக இளமையாய் இருக்கிறார்!”

நாம் பல நேரங்களில் ஒரு தொடுகை,ஒரு புன்னகை,ஒரு இனிய சொல்,ஒரு கவனம், ஒரு கேட்டல்,ஆகிய சிறு விஷயங்களை மறந்து விடுகிறோம் !நினைவு கொள்ளுங்கள்; அவை சக்தி வாய்ந்தவை;நம் வாழ்க்கையை,மற்றவர் வாழ்க்கையை மகிழ்ச்சிகரமாக ஆக்கக்கூடியவை.

உள்ளத்தில் அன்பிருந்தால் உருவத்தில் அழகு வரும்!