முரண்பாடுகள்!

வெட்ட வெளிதனிலே வெறுந்தரை மீதினிலே

சுட்டெரிக்கும் சூரியனின் கிரண நெருப்பினிலே

சட்டை மேல் சட்டையுடன்  சயனித்திருந்தேன் நான்

கொட்டும்  பனி போல் குளிரில் உடல் நடுங்க!

மொட்டை மாடியிலே, முன் பனிக்காலத்திலே

பட்டுவிரித்தது போன்ற பால் நிலா  ஒளியினிலே

கட்டும் வேட்டியும் இன்றி கட்டிலில் நான் கிடந்தேன்

மட்டில்லா பெருஞ்சூடு  முழு உடலை தகித்திடவே!

ஓசைகள் எதுவுமே என் காதுகளில்  விழுவதில்லை

ஒயாத நிசப்தமே எப்போது நிலைத்து நிற்க!

யாருமின்றித் தனியே கதவடைத்துக் கிடக்கையிலே

ஓங்கார ஒலிகள் என் உயிரைப் பிளக்குதன்றோ!

இது என்ன மாயமென்று எனக்குத் தெரியவில்லை

சொல்ல வல்லார் யாருமுண்டோ,

சொல்வீரோ  தயை கூர்ந்து?