உண்டி சுருங்குதல் யாருக்கழகு?

நடைப் பயிற்சி என்பது அவரவர் வசதியைப் பொறுத்தது.

சிலர் காலை சீக்கிரம் எழுந்து(என்னைப்போல்)நடைப் பயிற்சிக்குச் சென்று விடுகிறார்கள்.

சிலர் சிறிது நேரம் சென்று போகிறார்கள்.

காலையில் செல்ல இயலாதவர்கள் மாலையில் செல்கிறார்கள்.

சிலர் இரு வேளையும் செல்கிறார்கள்.

பொதுவான உடல் நலம்,உயர் ரத்த அழுத்தம் குறைய,உடல் பருமன் குறைய என்று பல காரணங்கள்

நான் காலையில் நடை மட்டும்;மாலையில் நடையுடன் கடைக்குச் செல்வதும்,அவசியம் என்றால்.

இவ்வாறு மாலை செல்கையில் சில சுவாரஸ்யமான உரையாடல்களைக் கேட்க நேரிடுகிறது.

இன்று மாலை செல்கையில் ஓரிடத்தில் இருவர் நின்று பேசிக் கொண்டிருந்தனர் .

ஒருவர் கேட்டார்”நல்லா மெலிஞ்ச மாதிரித் தெரியுதே?’

மற்றவர்”ஆமாம்.சாப்பாடு வேற குறைஞ்சு போச்சு.டாக்டர் சொல்லிட்டார், ரொம்பப் பருமனாத் தெரியுது.ஒரு நாளைக்கு 350 கிராமுக்கு மேல சாப்பிடக் கூடாது என்று..காலையில் 150 கிராம்,மாலையில் 200 கிராம் .அவ்வளவுதான்;அதைத்தவிர ரெண்டு வேளை நடை .மெலியாம என்ன செய்யும்?”

அவரைப் பார்த்தால் அவ்வளவு மெலிந்தவராகத் தெரியவில்லையே என யோசித்தேன்.

ஆனால் பின்னர் தெரிந்தது பேச்சு அவரைப் பற்றி அல்ல அவர் கூட இருந்த மூன்றாமவரைப் பற்றி என்று

அந்த நபரோ தனக்கும் இதற்கும் சம்பந்தமில்லை என்பது போல எங்கோ பார்த்தபடி,நின்று கொண்டிருந்தார்.நாக்கை வெளியே தொங்கப்போட்டபடி!

விளக்க வேண்டிய அவசியம் இல்லையே!