இரு சம்பவங்கள்;இரு கேள்விகள்!

நேற்று மாலை வெளியே செல்லும்போது நாலைந்து நரிக்குறவர்கள். ஓடுவதைக் கண்டேன். நின்று கவனித்தபோது தெரிந்தது ஒரு பூனையைத் துரத்திக் கொண்டு ஓடுகிறார்கள்  என்று..பூனையால் தப்பிக்க முடியவில்லை.அதைச் சுற்றி வளைத்து அதன் மீது ஒரு கோணிப் பையைப் போட்டுப் பிடித்துத் தோளில் போட்டுக்கொண்டு போய்விட்டார்கள்.

பாவம் பூனை.வெளியே கிளம்பும் போது மனிதன் எவனோ குறுக்கே வந்து  விட்டானோ?!  

***************************************************************

இரண்டு நாட்களாக இரவு படுத்தபின் ஒரு மூஞ்சூறு வீட்டுக்குள் வந்து தொந்தரவு செய்து கொண்டிருந்தது.தூங்கும்போது-அது தூங்கும்போது அல்ல- ,நான் தூங்கும்போது கடித்துத் தொலைத்து விடுமோ என் பயம்!நான் தரை மேல் படுக்கை விரித்துத்தான் படுக்கிறேன் .நேற்று காலை முதல்  ஒரு துர்நாற்றம்..வெளியே ஏதோ செத்துக் கிடக்குமோ என எண்ணினேன்.வேலைக்காரப்  பெண் வந்து பெருக்கும்போது படுக்கை அறை மூலையில் செத்துக்கிடந்த மூஞ்சூறைக் கண்டு பிடித்து அப்புறப்படுத்தினாள்

எனக்கு ஆச்சரியம்

மூஞ்சூறுதான் நம்மைக் கடிக்கக் கூடவில்லையே;ஏன் செத்தது?:))

(ஃபிரிட்ஜுக்குக் கீழிருந்து கிரிச்.கிரிச் சப்தம் கேட்டதும்,ஒரு கம்பை அடியில் நுழைத்துப் பரசினேன்.அதில் அந்த மூஞ்சூறுக்கு மூக்கில் அடி பட்டிருக்குமோ?)