ஆரஞ்சு மனிதர்கள்!

வழக்கம்போல் ஸ்வாமிஜியின் சத்சங்கக் கூட்டம்.

அவர் மேடையின் மீது  அமர்ந்திருந்தார்

அவர் முன் பக்தர்கள் கொண்டு வந்த பழங்கள் தட்டுக்களில் வைக்கப் பட்டிருந்தன

ஸ்வாமி கையில் ஒரு ஆரஞ்சுப் பழத்தை எடுத்தார்.

தன் உரையைத் துவக்கினார்

“இதோ என் கையில் இருப்பது ஆரஞ்சுப்பழம்தானே சந்தேகம் இல்லியே?.... (சிரிப்பு)

கூட்டத்தில் இருந்த  ஒருவரை அழைத்தார்”சந்தேக சுந்தரம்!இங்கே வா”......(சிரிப்பு)

அவர் வந்தார்.ஸ்வாமி கேட்டார்”இப்போது இந்தப்பழத்தை நான் என் கையினால் பிழியப் போகிறேன்;பிழிந்தால் என்ன வரும்?

“சாறு வரும்’என்றார் அவர்

என்ன சாறு?

ஆரஞ்சுச் சாறுதான்

நிச்சயமாக?

நிச்சயமா.

ஆப்பிள் சாறோ ,திராட்சைச் சாறோ வராதா?

அதெப்படி வரும்?

இதுவே திராட்சைப் பழம் என்றால்?

திராட்சைச் சாறு வரும் உள்ளே இருப்பதுதானே வெளியே வரும்”

போய் உட்கார்

கூட்டத்தினரை நோக்கிப் பேச ஆரம்பித்தார்

“இப்பழத்தைப் பிழிந்தால் ஆரஞ்சு சாறு வரும்;ஏனெனில் உள்ளே இருப்பது அதுதான். இதோ இந்த திராட்சைப்பழத்தைப் பிழிந்தால் திராட்சைச் சாறுதான் வரும்;ஏனெனில் உள்ளே இருப்பது அதுதான்.

இதே போல் உங்களுக்கு யாராவது சுடுசொல்லால்  மன அழுத்தம் ஏற்படுத்தினால், நீங்கள் விரும்பாத சொல்லைப் பேசி மனத்தைப் பிழிந்தால்.என்ன வெளி வருகிறது? கோபம், வஞ்சம்,வெறுப்பு இவை வெளியாகின்றன.காரணம் அவையே உங்கள் மனத்தில் இருக்கின்றன;எனவே அவையே வெளி வருகின்றன.உள்ளே இருப்பதுதானே வெளியே வரும்?

பிழிபவர்கள் யாரென்பது முக்கியமில்லை.உங்கள் அப்பாவாக,சகோதரனாக,நண்பனாக மேலதிகாரியாக யாராக வேண்டுமானாலும் இருக்கலாம்.உங்கள் உள்ளிருப்பதுதான் வெளியே வரும்!

ஆனால் உள்ளே என்ன இருக்கிறது என்பது உங்களிடம்தான் இருக்கிறது.உங்கள் மனம் அழுக்கால் நிரம்பியிருந்தால்,வெளியே வருவது அழுக்காகத்தான் இருக்கும்;உள்ளம் அன்பால் நிரம்பியிருந்தால்,வெளியே வருவது அன்பாகத்தான் இருக்கும்.

எனவே உள்ளிருக்கும் எதிர்மறை எண்ணங்களை அகற்றி மனத்தில் நல்லெண்ணங்களை ,அன்பை,நிரப்புங்கள்.

உங்கள் வாழ்க்கை அர்த்தமுள்ளதாக,அன்பு நிறைத்ததாக மாறும்.

என்னப்பா நீ இன்னும் சந்தேக சுந்தரம்தானா?

(ஸ்வாமி பித்தானந்தாவின் உரையிலிருந்து)