யார் காவல்?

காப்பதுன் கடமை;கண்மூடிக் காத்து நில்

இப்படிச் சொன்னது கண், இமையைப் பார்த்து

சிரித்தது இமை இச்சொல்லைக் கேட்டு

கண்மூடாமல் காக்க வேண்டும் என்று சொல்வர்

என்னவோ நீ கண்மூடிக் காக்கச் சொல்கிறாய்

சினத்தால் சிவந்த கண்ணில் எரிச்சல்

சிரித்து நின்ற இமை மூடியது கண்ணை

சொல்லிச் செய்வதல்ல கடமை

சொல்லாமல் செய்வதன்றோ அறிவுடைமை!

மூடுவதும் காவல்தான்,சிலநேரம்

திறப்பதும் காவல்தான்

இமை மூடினால்தான் கண்ணுக்குக் காவல்

மூடாமல் திறந்தால்தான் பொருளுக்குக் காவல்

எல்லாமே காவல்தான்!

உடலுக்கு உயிர் காவல்

கவியரசு சொன்னார்

உண்மை!

உயிர் இருக்கும் வரை 

உடல் நிற்கும்

உயிர் எனும் காவல் நீங்கின்

உடல் வீழும்!

கள்வர்கள் எப்போதும்

காக்கப்படும் பொருளையே 

கவர்வர்!

காவல் காக்கும் கவலாளியை அல்ல!

ஆனால் 

காக்கப் படும் உடலை விட்டுக் 

காக்கும் உயிரைக் கவர்கிறான் எமராஜன்!

உயிரென்னும் காவலன்  போனபின் 

உடலுக்கு ஏது காவல் 

இறந்து விட்டால்  பின்  யார் காவல்?

பெண்ணின் கற்புக்கு எது காவல்

ஐயன் சொல்வான்

நிறை காக்கும் காப்பே தலை.

பாலுக்கும் காவல்

பூனைக்கும் தோழன் 

இதுவே சிலர் நிலை!

கள்ளனை மடியில் அமர்த்திக் 

காவல் காத்த கதைதான்!

காவல் வலுத்த தோட்டத்தில்

மாங்காய் திருடும் சுகம்

வீட்டுத்தோட்ட மாமரத்தில் 

பறிப்பதில் கிடைப்பதில்லை!

குரங்காய்த் தாவும் மனத்துக்கு எது காவல்?

அறிவு ஒன்றே காவல் 

அறிவென்னும் அங்குசத்தால் 

அடக்கவில்லையெனில்

மனமென்னும் மதயானை 

பாகனையே கொல்லும்!

டிஸ்கி:இரண்டு நாட்களாக உடல் நிலை சிறிது சரியில்லை.முன்பே தயாராகயிருந்த பதிவுகளைப் போட்டு விட்டு எஸ்கேப்!கருத்துக்குப் பதில் சொல்லவோ, பிற பதிவுகளைப் படித்துக் கருத்துச் சொல்லவோ இயலவில்லை!
மன்னிக்கவும்!