வேதாளம்!

அது ஓர் அடர்ந்த வனம்

சூரிய ஒளியே உட்புகாததால், பகலில் கூட இருண்டு காட்சியளிக்கும் வனம்.

ஆனால் அங்கு வாழும் பறவைகள்,மிருகங்கள் கணக்கற்றவை;இரவிலும் அவை எழுப்பும் பல்வேறு விதமான ஒலிகள் வனமெங்கும் ஒலித்துக் கொண்டிருக்கும் .

எனவே தூங்கா வனம்!

அத் திக்குத் தெரியாத காட்டில் அதோ அங்கு மட்டும் என்ன ஒளி?

ஒரு பெரிய மரம்.

அதைச் சுற்றியே ஒளி வெள்ளம் பரவி நிற்கிறது.

எங்கிருந்து இந்த ஒளி?

மரத்தில் ஒரு வேதாளம் தலைகீழாகத் தொங்கிக் கொண்டிருக்கிறது.

அவ்வப்போது நெருப்பைக் கக்குகிறது.

அதுவே ஒளிக்குக் காரணம்!

அந்த ஒளி இலைகளின் மீதும் பட்டுப் பிரதிபலித்து வேதாளத்தின் மீது விழும்போது வேதாளம்  பச்சை வண்ணத்தில் ஒரு தேவாங்கு போல் காட்சியளிக்கிறது

அது என்ன பப்பாளி மரமா?

அது பப்பாளி மர உச்சியில் ஆடும் பச்சைத் தேவாங்கா?

இல்லை அது பப்பாளி மரமும் அல்ல,அது தேவாங்கும் அல்ல;

அது வேதாளம்தான்!

அப்போது அந்த மரத்தை நோக்கி ஒருவன் வருகிறான்.என்ன கம்பீரமான ராஜ நடை

அரசன் போல்தான் தோன்றுகிறான்!

நெருங்கி வர வர முகம் தெரிகிறது

எனக்கு மிகவும் பரிச்சயமான முகம்

அந்த நடையே எனக்கு தெரிந்தவன் என்று உணர்த்தியது;இப்போது முகத்தைப் பார்க் கையில் அது உறுதியானது

யார் இவன்;மிகவும் பழக்கமானவன்.

யோசிக்கிறேன்.

அவன் மரத்தில் ஏறி வேதாளத்தை எடுத்துத் தோளில் போட்டுக் கொண்டு புறப்படு கிறான்

அது ஒரு சிரிப்பு,அல்ல,இளிப்பு இளிக்கிறது

“விக்ரமாதித்யா!இன்று ஒரு மாறுதலுக்கு நான் உன்னைச் சுமக்கிறேன்” என்று கூறிக் கிழே குதித்து மன்னனைத் தோளில் போட்டுக் கொள்கிறது

“இப்போது ஒரு கேள்வி கேட்பேன்,அதற்குச் சரியான விடையை நீ சொல்லா விட்டால் உன் தலையத் தெறிக்கவிடலாமா?” என்று பயங்கரமாகக் கேட்கிறது

மன்னன் (யார் இவன் மிகவும் தெரிந்த முகம்?) சரி என்கிறான்

”ஒரு தீபாவளி.நான்கு படங்கள் ரிலீஸ் ஆகின்றன;சூப்பர் ஸ்டார், உலக நாயகன், தல,தளபதி இவர்களின் படங்கள்;முதல் நாள் வசூல் எந்தப் படத்துக்கு அதிகம்”

மன்னன் உடனே சொல்கிறான்”சூப்பர் ஸ்டார் படத்துக்குத்தான்”

வேதாளம் அவனைத் தொபகடீர்,என்று கீழே போடுகிறது”கிடையாது.முதல்நாள் மன்னன் தலதான்;அந்தப் படத்துக்குத்தான் வசூல் அதிகம்;அதுவும் படத்துக்கு என்பேர் வச்சதாலே ஒரு வசூல் சாதனை” என்று கூத்தாடுகிறது

”இப்போ உன் தலையைத் தெறிக்க விடலாமா?”

மன்னன் தலை இஞ்சி நூறாகிறது(சுக்குக்குப் பதில் இஞ்சி!)

“ஐயோ ஐயோ”என்று அலறியவாறே தலையைப் பிடித்தபடி எழுந்திருக்கிறேன்!

மாயக்கட்டிலில் படுக்கும் முன் வேதாளம் படம் பற்றிய நினைவுகளோடு படுத்ததால் வந்த வினை!

......................

// இத்துடன் நிற்கவில்லை. சென்னை பித்தனையும் மாயக்கட்டில், விடவில்லை. அவர் அன்னையை அன்றிரவு பராமரிக்க பிரத்யேக ஏற்பாடுகளை செய்து சிவாவின் வீட்டிற்கு இரவு 10 மணிக்கு வந்தார்.//

இது மாயக்கட்டில் இறுதிப்பகுதியில் நான் நீக்கிய பத்தி!

படுத்ததின் விளைவைத்தான் படித்து விட்டீர்களே!

அந்த மன்னன்.......வேறு யார்?நான்தான்!