ராசாவும் கனியும்!

இது ஓர் அரசனும் கனியும் பற்றிய கதை

நீங்கள் அறியாத கதையல்ல.

இது நீங்கள் அறிந்த கதைதான்.

கனி அரசனை விட்டு நீங்கிய கதை.

கடையெழு வள்ளல்களில் ஒருவன் அதியமான்.

தகடூரைத்  தலைநகராகக் கொண்டு ஆட்சி செய்த மன்னன்.

ஒரு முறை அவனுக்கு ஓர் அரிய நெல்லிக்கனி கிடைத்தது

அக்கனியை உண்டோர் பல காலம் வாழ்ந்திருப்பர்.

அதன் சிறப்பை அவனும் அறிவான்.

அப்போது அவ்வையார் வரவே அவருக்கு அக்கனியை ஈந்து பரிவுடன் 

உண்ணச் சொன்னான்.

அக்கனியின் சிறப்பை அவ்வை உண்டு முடித்தபின்னரே அவருக்குத் தெரிவித்தான் 

அவ்வையார் தான் நீண்ட நாள் வாழ எண்ணாமல் எனக்கு ஈந்தானே இம்மன்னன் என வியந்து அவனைப் போற்றிப் பாடினார்

 பால்புரை  பிறைநுதல்  பொலிந்த  சென்னி
நீல மணிமிடற்று  ஒருவன்  போல
மன்னுக  பெரும  நீயே  தொன்னிலைப்
பெருமழை  விடரகத்து  அருமிசை  கொண்ட 
சிறியிலை  நெல்லித்தீங்கனி  குறியாது
ஆதல்  நின்னகத்து  அடக்கிச்
சாதல்  நீங்க  எமக்கு  ஈத்தனையே

பெரிய மலையிடத்து மிகவும் இடருக்குப் பின் பெற்ற அரிய நெல்லிக்கனியை உனக்கென்று கொள்ளாமல் ,அதன் சிறப்பை எனக்குச் சொல்லாமல் ஈந்து எனக்கு இறப்பில்லா வாழ்வு ஈந்தனையே என்று பாராட்டினார்!