கலைஞரும்,மணிமேகலையும்,பூம்புகாரும்!

மணிமேகலை என்பவள் யார்?

ஐம்பெருங்காப்பியங்கள் என்று அழைக்கப்படுபவை, சீவக சிந்தாமணி,சிலப்பதிகாரம், மணிமேகலை, வளையாபதி,குண்டலகேசி என்பவை ஆகும்

சிலப்பதிகாரமும்,மணிமேகலையும் இரட்டைக்காப்பியங்கள் என்றழைக்கப்படுபவை

சிலப்பதிகாரத்தின் பின் வரும் கதையே மணிமேகலை.

சிலப்பதிகாரம் இல்லறத்தையும்,மணிமேகலை துறவறத்தையும் வலியுறுத்துகிறது.

மணிமேகலை என்பவள்,காப்பிய நாயகி,யார்?

மாதவிக்குக் கோவலனிடமாகப் பிறந்த மகள்.

துறவறத்தில் நாட்டம் கொண்டவள்.

அவள் மீது மோகம் கொண்ட உதயகுமாரனை உதறித்தள்ளி,புத்தத்துறவியாகி,மக்களின் பசியைத் தீர்ப்பதையே தன் கடமையெனக் கொண்டு வாழ்ந்த ஒரு மாதர் குல மாணிக்கம்.

தனக்குக் கிடைத்த அமுதசுரபியை மக்களின் பசிப்பிணி தீர்க்க  மட்டுமே பயன்படுத்தியவள் !

காதலன் இறந்தபின் துறவு பூண்டாள் அவள் தாய் மாதவி.

மணவாழ்வில் ஈடுபடாமலே துறவு பூண்டாள் மனிமேகலை.

இவர்களை நினைக்கும்போது எனக்குக் கே.பி.சுந்தராம்பாளை நினைக்காமல் இருக்க 

முடியவில்லை.

1926 ஆம் ஆண்டு அவருக்கும் எஸ்.ஜி.கிட்டப்பாவுக்கும் திருமணம் நடந்தது.

1933இல் கிட்டப்பா  33 வயதில்காலமானர்.அப்போது கே.பி.எஸ்ஸின் வயது 25.

அந்த வயதிலிருந்தே வெள்ளைப் புடவை கட்டித் திருநீறணிந்து ஒரு துறவி போல் வாழ்ந்தவர் அவர்.

அவரை மணிமேகலைக்கு ஒப்பிடுங்கள்! நியாயம்!

கே பி எஸ் பற்றிய ஒரு சுவாரஸ்யமான தகவல்

பூம்புகார் படத்தில் கவுந்தி அடிகள் பாத்திரத்தில் கேபிஎஸ் நடிக்க வேண்டும் என்று கலைஞர் விரும்பினாராம்;

ஆனால் சுந்தராம்பாள் அவர்களோ,அவர் பகுத்தறிவுவாதி ,நான் தெய்வ பக்தை எனவே நடிக்க முடியாது என்று மறுத்தாராம்.

பின்,தமிழுக்காக நடிக்கவேண்டும் என்று கேட்டுக் கொண்டபின் ஒப்புக் கொண்டாராம். பின்னரும் பிரச்சினை!

கவுந்தி அடிகள் சமணத் துறவி.கேபிஎஸ்ஸோ நெற்றியில் திருநீற்றுப்பட்டை அணியாமல் இருக்க மாட்டார்.ஒரு சமணத் துறவி திருநீறு அணிவாரா? மிகுந்த சர்ச்சைக்குப் பின் ஒரு கீற்றாகத் திரு நீறு அணிந்து நடிக்கச் சம்மதித்தாராம்..

அதோடு நிற்கவில்லையாம்.

”அன்று கொண்ட அரசின் ஆணை வென்று விட்டது

நின்று கொல்லும் தெய்வம் எங்கே சென்று விட்டது ”

என்று கடவுளைக் கிண்டல் செய்வது போல் அமைந்த பாடல் வரிகளைப் பாட மறுத்து விட்டாராம்.பின் “நின்று கொல்லும் தெய்வம் இங்கே வந்து விட்டது ”என்று மாற்றப்பட்டதாம் அந்த மணிமேகலைக்காக!

இது சமீபத்தில் நான் படித்த தகவல்.

கொள்கையிலிருந்து வழுவாத அவரை எப்படிப் போற்றுவது?!