கால் கட்டுப் போட்டாச்சு!!

மாலை

ஐந்து மணிக்கு வெளியே போய்

ஆறு மணிக்கு வீடு திரும்பும்

பழக்கம் இல்லை சில நாட்களுக்கு

கடை கண்ணிக்குப் போய்

காய் பழம்,மளிகை வாங்கும்

வேலை இல்லை மூன்று வாரம்.

ஓய்வு,ஓய்வு,ஓய்வுதான்!

கடவுள் செய்த முடிவு

கட்டுப் பட்டு(கட்டுப்போட்டு)த்தானே

ஆக வேண்டும்!

நேற்று மாலை நண்பர் மூவருடன் இரவு உணவருந்தி விட்டுக் கார் பார்க்கில் காத்திருந்த நேரம்,பின்னோக்கி வந்த காரொன்று என் இடது காலில் ஏறியது.

இன்று எக்ஸ்ரே எடுத்த பின் சுண்டு விரலிலும்,அடுத்த விரலிலும் மயிரிழை விரிசல் தெரிய வந்து.மருத்துவர் கட்டுப்போட்டு,காலைத்தூக்கி வைக்கவும் நடக்காமல் இருக்கவும் அறிவுறுத்தி அனுப்பி வைத்தார்.

அதுமட்டுமா?

வலிக்கொன்று, வீக்கத்துக்கொன்று, வலி மாத்திரையின் பக்க விளைவுகளைச் சமாளிக்கவொன்று,கால்சியம் ஒன்று வைட்டமின் டி ஒன்று எனப் பல மாத்திரைகள் தந்து ஏழு நாட்கள் ’உணவுக்குப் பின்’ சாப்பிடச் சொல்லி விட்டார்.

நான் கேட்டேன்”இதுவே ஒரு உணவு போலிருக்கிறதே?”

மருத்துவர் ரசிக்கவில்லை!

இன்று முதல் வீட்டுக்குள்ளேயே சிறைப்பட்ட ஓய்வு தொடக்கம்!