சில்லுனு ஒரு பீர்!

தாகத்தைத் தணிக்க ’பீர் ’குடிப்பது நல்லதா?

பலர் சொல்வார்கள் “இந்த வெயிலுக்கு ஜில்லுன்னு ஒரு பீர் அடிச்ச சுகமா இருக்கும் ”என்று.

அதுதான் மேட்டர்.—’ஜில்லுன்னு’-அவ்வளவுதான்.

உண்மையில் பீர் குடித்தபின் அதுவும் மற்ற மது வகைகள் போல் உடல் தண்ணீரை வற்ற வைக்கிறது என்றே சொல்கிறார்கள்(dehydration)எனவே காசைச் செலவழித்து அதைக் குடிப்பதற்குப் பதில்,இளநீர் குடிக்கலாம்!காதி க்ராஃப்டில் 8 ரூபாய்க்கு பாக்கெட்டில் நீரா கிடைக்கிறது.

(சே!இன்று வெயில் ரொம்ப ஜாஸ்தி.சாயந்திரம் ஜில்லுன்னு ஒரு………….!)

அன்று ஒரு நண்பர் சொல்லிகொண்டிருந்தார்”வர வர பீர் எல்லாம் தரம் குறைந்து விட்டது.நேற்று நாலு பாட்டில்  பீர் குடித்தேன் .ஒரு எஃபெக்ட்டும் இல்லை!”

இவர்கள் எல்லாம் பாட்டிலில் குடித்தால் கட்டுப்படியாகாது.குழாய் வைத்த பீப்பாயில் பீரை நிரப்பி,அதற்கு முன் நிறுத்திக் கையேந்திக் குடிக்கச் சொல்ல வேண்டியதுதான்!

பீப்பாய் என்றதும் நினைவுக்கு வருவது ;அலிபாபாவும் 40 திருடர்களும்’

பீப்பாயில் ஒளிந்திருக்கும் 39 திருடர்களயும் உருட்டித்தள்ளி கொன்று விடுகிறார்கள்.

திருட்டு என்பது என்ன?அடுத்தவருக்குச் சொந்தமான பொருளை அவருக்குத் தெரியாமல்,அவரது சம்மதமோ,அனுமதியோ பெறாமல் தனக்கு சொந்த மாக்கிக்கொள்வது!

எல்லாத் திருட்டுமே  பணத்தை அடிப்படையாகக் கொண்டதல்ல.சில வசதியானவர்கள் கூட சில நேரங்களில் ஒரு பொருளைப் பார்த்தவுடன் உள்ள அரிப்பில் அதைத் திருடுகிறார்கள்-சின்னச் சின்ன பொருள்களைக்கூட!இதற்குப் பெயர் ’க்ளெப்டோமேனியா’.இதை ஒரு மன நோய் என்றே சொல்ல வேண்டும். ஒரு முறை இந்திய கிரிக்கெட் அணி இங்கிலாந்து சென்றபோது ஒரு வீரர் ஒரு மாலில் காலுறை திருடி மாட்டிக் கொண்டார்(சுரு நாயக்?)

இப்போது சென்னையிலும் மால்கள் பெருகி வருகின்றன.இந்தக் கோடையில் குளு குளு என்று பொழுதைப் போக்க மக்கள் பலர் மால்களுக்குச் செல்ல ஆரம்பித்து விட்டனர்.செய்தித்தாளில் படித்தேன்,ஒரு விடுமுறையன்று எக்ஸ்பிரஸ்  அவென்யூ மாலில்,கூட்டம்  அமோகமாம்.ஆனால் வாங்க வந்தவர்களை விடப் பொழுதுபோக்க வந்தவர்கள்தான் அதிகமாம்.ஓசியில் ஏசி என்றால் நல்ல சுகவாசியாய்  நண்பர்களுடன் பேசிப் பொழுதுபோக்க வேண்டியதுதானே!

நான் சென்னை வாசிதான். ஆனால் சிடிசெண்டர் மால் தவிர வேறு எந்த மாலுக்கும் இது வரை சென்றதில்லை.நான் கல்லூரியில் படிக்கும் காலத்தில் இந்த மாலெல்லாம் கிடையாது. எங்களுக்கிருந்த ஒரே மால்,மறக்க முடியாத, வேறெந்த மாலையும் விட என்றும் சிறந்ததான மூர் மார்க்கெட்தான்.என் இனிய நினைவுகளுடன் தொடர்புடைய இடம்.

லிமெரிக் எழுதி ரொம்ப நாளாச்சு.இன்று ஒரு லிமெரிக்கோடு முடிக்கலாம்!

”பாருக்குப் போனான் சுகுமார்

குடிக்க நினைச்சான் கொஞ்சம் பீர்

வந்தது பீர் இரண்டு பிட்சர்

கூடவே  கொறிக்கக் கொஞ்சம் மிக்சர்

பின்னாலே நடந்தது ஒரே ரப்சர்!”