பிறந்தநாள் வாழ்த்துகள்,’வெல்ல முடியாதவருக்கு’!

( இடை வேளை இன்னும் முடியவில்லை.டூரிங் டாக்கீஸில் இடைவேளையில் முறுக்கு விற்கும் சிறுவன் போல் ஒரு அவசரத் தோற்றம்)

நாள்-31-12-2006
இடம்-பார்க் ஷெராட்டன் ஹோட்டல்,சென்னை
நேரம்-இரவு 9.00 மணி.
நான் என் நண்பர்கள் மூன்று பேருடன் இரவு உணவை முடித்துக் கொண்டு புறப்படத்தயாராகிறேன்.


அந்த நேரத்தில் அந்த முன்னணிக் கதாநாயகர் தன் மனைவி மற்றும் நண்பர்களுடன் 'தல' காட்டுகிறார்.


அவரை முன்பே நண்பனின் மகன் திருமணத்தில் சந்தித்து அறிமுகம் உண்டு.


அவரைப் பார்த்ததும் வழமையான குசலம் விசாரிப்புக்குப் பின் நான் திடீரென்று அவரிடம் சொன்னேன்.


”அடுத்த ஆண்டு நீங்கள்தான் தமிழ்த் திரையுலகின் சூப்பர் ஸ்டார்”


அவர் முகத்தில் வியப்பு கலந்த ஒரு மகிழ்ச்சி.


அவர் கேட்டார் “எப்படிச் சொல்கிறீர்கள்?”


என் நண்பர்கள் சொன்னார்கள் “ஸார்,ஜோதிடத்தில் தேர்ச்சி பெற்றவர்”


நான் சொன்னேன்”உங்கள் முகத்தையும்,உங்களை நான் சந்தித்திருக்கும் நேரத்தையும் வைத்துக் கூறினேன்”


அவர் அப்போது நடித்துக் கொண்டிருக்கும் படம் பற்றிப் பேசினோம்.(ஆழ்வார்)


பின் அவர்களைப் பேச விட்டு விட்டு நான் டாய்லெட்டுக்குப் போய்விட்டேன்.
முடித்து விட்டு வெளியே வந்து பார்த்தால் அவர் எனக்காகத் தனியாகக் காத்துக் கொண்டிருக்கிறார்.


“நீங்கள் தொழில் முறை சோதிடரா?” அவர் கேள்வி.


“இல்லை.சோதிடம் எனது பொழுதுபோக்கு.நெருங்கிய உறவினர்களுக்கும் நண்பர்களுக்கும் மட்டுமே நான் பார்க்கிறேன்.உங்களைப்  பார்த்த அந்த  வினாடியில்
 சொல்ல வேண்டும் என்று தோன்றியது.சொன்னேன்”.-நான்


அவர் என் தொலை பேசி எண்ணைக் கேட்டு வாங்கித்தன் கை பேசியில் சேமித்துக் கொண்டார்.பின் சொன்னார்”நான் விரைவில் உங்களுடன் தொடர்பு கொள்கிறேன்.”.


ஆனால் அதன் பின் அவரிடமிருந்து தகவல் ஏதுமில்லை.


அடுத்த ஆண்டு முடிவில், முன்பே சூப்பர் ஸ்டார் நடித்த ஒரு படம் மீண்டும் படமாக்கப் பட்டு, இவர் சூப்பர் ஸ்டார் நடித்த பாத்திரத்தில் நடிக்க,அப்படம் பெரிய வெற்றியைப் பெற்றது.


என் சோதிடம் பலித்து விட்டதுதானே?


(இது வரை மீள்பதிவு )


 இன்று பிறந்த நாள் காணும் அந்த நடிகருக்கு வாழ்த்துகள்.


திரைத்துறையில் அவரைப் பற்றி ஒருமித்த கருத்து ”நல்லவர்”


ரசிகர் மன்றத்தின் துணையுடன் தன்னை வளர்த்துக் கொள்ள நினைக்கும் நடிகர்களிடையே,தன் ரசிகர் மன்றங்களைக் கலைக்கும் துணிச்சல் உள்ளவர்.


மனதில் தோன்றியதை வெளிப்படையாக உரைப்பவர்.(அதனால் சில பிரச்சினைகளிலும் சிக்கியவர்)


அவர் செய்யும் பிரியாணிக்குத் திரையுலகில்  பல ரசிகர்கள்.


சமீபத்தில் ஒரு படத்துக்காக டூப் இன்றி ஹெலிகாப்டரில் இருந்து தொங்கி நடித்ததாகச் செய்திகள் வந்துள்ளன.


வெல்ல  முடியாதவர் என்ற பெயருடையவர்.


அவருக்கு மீண்டும் என் இனிய பிறந்த நாள் வாழ்த்துகள்.