தேவலோக மயிலை!

நான் சென்னை மயிலை விவேகானந்தா கல்லூரியில் பட்ட மேற்படிப்பு படித்து வந்த காலத்தில், மயிலையை ஒரு தேவ லோகம் என்றே நான் சொல்லி வந்தேன்.

காரணங்கள் என்ன என்று யோசிக்கிறீர்களா?

சொல்கிறேன்.

தேவலோகத்தில் முக்கியமான இரண்டு உண்டு அவை கற்பகமும்,காமதேனுவும்.

அதாவது கற்பகத் தருவும் காமதேனுப் பசுவும்.

கேட்டதையெல்லாம் தரும் கற்பகத் தரு.

அது போலவே அன்னை கற்பகாம்பாள் அருள் பாலிக்கும் தலம் மயிலை.

நினைத்தவுடன் சென்று படம் பார்க்க லஸ்ஸில் காமதேனு திரையரங்கம்!

மேலும் தேவ லோகத்தில் ரம்பை,ஊர்வசி,மேனகா,திலோத்தமை எனப் பல அழகிகள்.

அந்த வயதில் பார்க்கும் பெண்ணெல்லாமே ரம்பை,ஊர்வசிகள்தானே! அதுவும் மயிலை!

தேவலோகத்தில் அமுதம்.

டாங்க் உடுப்பியில் அமுதம் போன்ற காப்பி!

தேவலோகத்தில் பொழுது போக்க இசை,நாட்டியம் ,நாடகம்.

இங்கே விடுதியை விட்டு வெளியே வந்து சாலையைக் கடந்தால் மைலாப்பூர் ஃபைன் 

ஆர்ட்ஸ் .

அப்பொதெல்லாம் செண்டிமெண்டலாகச் சில நாடகக் குழுக்கள்,அங்குதான் தங்கள் புதிய நாடகங்களை அரங்கேற்றுவார்கள்.

மேடை ஏறுவதற்கு முதல் நாள் முழு மேடை ஒத்திகை உண்டு.

அப்படிப் பல நாடகங்களை மேடை ஒத்திகையிலேயே பார்த்து ரசித்ததுண்டு .

நாங்கள் ஐந்தாறு நண்பர்கள் மட்டுமே செல்வோம்.

பழக்கம் காரணமாக எங்களை அனுமதிப்பார்கள்.

ராகினி ரெக்ரியேஷன்ஸின்(கே.பாலசந்தர்) மெழுகு வர்த்தி,சர்வர் சுந்தரம்,நீர்க்குமிழி, விவேகாவின்(சோ) மெட்ராஸ் பை நைட் இப்படிப் பல!

ஒரு முறை ஒரு குழுவைச் சேர்ந்த ஒரு நடிகர்(பெயரைச் சொல்வது முறையன்று) எங்களிடம் வந்து ஆங்கிலத்தில்”ஒத்திகையைப் பார்த்தீர்கள் என்றால் நாடகத்தை ரசிக்க முடியாது”என்றார்.

எங்கள் திமிர் சும்மா இருக்குமா?”நாடகத்தைப் பார்க்க மாட்டோம் “என்று திருப்பி அடித்தோம்.

பாவம் அவர்.

இயலும் இசையும் ரசிக்க ஆள்வார்பேட்டை வீனஸ் காலனியில் வாரியார் ஸ்வாமிகளின் கம்பராமாயணம், பட்டி மன்றங்கள்,கர்நாடக சங்கீதக் கச்சேரிகள்(அப்போதே கர்னாடக சங்கீத்த்தில் ஆர்வம் உண்டு).

படிப்பதும் உண்டு! :)))