பதிவர் சந்திப்பும்,ஆப்பிள் பஜ்ஜியும்!

சென்னையின் முக்கிய அடையாளங்களாகக் கருதப்பட்ட ,இன்று இல்லாமற்போய் விட்ட சில இடங்கள் பற்றி இன்று” இந்தியாவின் நேரங்கள்”நாளிதழில் ஒரு குறிப்பு படித்தேன்.அதில் சொல்லப்பட்ட இடங்களில் ஒன்று “உட்லாண்ட்ஸ் டிரைவ் இன்”.என் கல்லூரி வாழ்க்கை தொடங்கி சில ஆண்டுகள் முன் வரையான காலத்தைப் பற்றிய  பல இனிய நினைவுகளைத் தந்து கொண்டிருக்கும் இடம்.

இடம் இல்லை;நினைவுகள் இருக்கின்றனவே!

எப்படி ப்ளூ டைமண்டையும்,சாந்தோமையும்,எல்ஃபின்ஸ்டைன் ஜஃபார்கோவையும் என்னால் மறக்க இயலாதோ அது போலவே எனக்கு மட்டுமல்ல,பல சென்னைவாசிகளுக்கு டிரைவ் இன் உட்லாண்ட்ஸை மறக்க முடியாது.

நான் பதிவுலகில் புகுந்திருந்த நேரம்.ஒரு முறை டிரைவ் இன்னில் பதிவர் சந்திப்பு ஏற்பாடு செய்யப்பட்டது.அப்போது பாலபாரதியும் ,மா.சிவகுமாரும் தலைமையேற்று வழி நடத்திக் கொண்டிருந்தார்கள்.சிறு தயக்கத்துடன் நானும் அச் சந்திப்புக்குச் சென்றேன்.ஒரு தனி அறையில் வட்ட வடிவில் இருக்கைகள் போடப்பட்டிருந்தன.எனக்கு அப்போது யாரையும் தெரியாது.அன்று முக்கியமானவர்களாக எனக்குத் தெரிந்தவர்கள்-பாலபாரதி,மா,சிவகுமார்,யுவகிருஷ்ணா(லக்கி லுக்),பொன்ஸ் பூர்ணா இன்னும் ஓரிருவர்.டோண்டு அவர்கள் வரவில்லை.தமிழ் மண நிர்வாகிகள் சிலர் வந்திருந்தனர்.யாழ் பதிவர் ஒருவரும் வந்திருந்தார்.பெயர் நினைவில்லை.

அன்று என்ன செய்யலாம் என்று பேசும்போது துறை சார்ந்த பதிவுகள் அதிகம் வருவதில்லை என்று சொன்ன பால பாரதி   திரு.டி.பிஆர்.ஜோசப் அவர்கள் வங்கி நடைமுறைகள் பற்றி எழுதுவதாகச் சொல்லியிருக்கிறார் என்றார்.பின்னர் எழுதினாரா எனத் தெரியவில்லை இல்லையெனில் இப்போது எழுதலாமே!அவரைத்  தவிர அதைச் சுவாரஸ்யமாக எழுதக்கூடிய மற்றொருவர் திரு. வே.நடனசபாபதி என நான் நினைக்கிறேன்.

அன்று தமிழ்மணத்தினர் அளித்த அன்பளிப்பு ஒரு டீ சர்ட்!படத்தில் நான் அணிந்திருப்பது!

மிக இனிமையான ஒரு சந்திப்பு,அந்த என் முதல் சந்திப்பு!

என்ன ஆப்பிள் பஜ்ஜி பற்றி ஒன்றும் சொல்லவில்லையே என்கிறீர்களா?

அன்று ஆப்பிள் பஜ்ஜி கொடுக்கப்படவில்லை!

ஆனால் அங்கு ஆப்பிள் பஜ்ஜி பிரசித்தம்.

பல முறை சாப்பிட்டிருந்தாலும்,குறிப்பாக நான் எம்,எஸ்ஸி . இல் தேர்ச்சி பெற்றபின் என் உறவினர் ஒருவர் பார்ட்டி கேட்டார், டிரைவ்இன்னில்.

அன்று சாப்பிட்ட முக்கியமான ஐட்டம்---ஆப்பிள் பஜ்ஜி,மசால்தோசை .

செய்து சாப்பிட்டுப் பாருங்கள் ஆப்பிள் பஜ்ஜி!

இனிப்பும் காரமும் சேர்ந்த அந்தக் கலவை!

அந்தக் காப்பியையும் மறக்க முடியுமா?

(பதிவர் சந்திப்பு அன்று கூடக் கூட்டம் தொடங்கும் முன் ஒரு காப்பி குடித்து விட்டே சென்றேன்)

ஈடு செய்ய முடியாத இழப்பு!