தனி ஒருவன் - முடிவு!

கிருஷ்ணசாமி அந்த செக்கை மேஜை மீது வைத்து, அதன் மீது தண்ணீர் டம்ளரை பாரமாக வைத்து விட்டு தன் உரையை ஆரம்பிக்கத் தயாரானார்.  

அங்கு நிலவிய பரிபூரண அமைதியைக் கிழித்துக் கொண்டு அவரது கம்பீரமான குரல் அம்மாபெரும் கூட்டத்தின் காதுகளில் தேனாகப் பாய்ந்தது.

                 விழாவை அமைப்பதற்கு அரும்பாடுபட்ட குழுவிற்கு நன்றி தெரிவித்து உரையைத் தொடங்கினார்.  தமது 33 வருட உத்யோக அனுபவித்தின்போது தன்னை வெகுவாக பாதித்த சிலபல அனுபவங்களை அழகாக விவரித்தார்.  தனக்கு முன் பேசிய சிலர் தனது உத்யோக வெற்றியின் ரகசியம் எதுவாக இருக்கும் என்று கேள்வி எழுப்பி தங்கள் அனுபவத்தில் கண்ட சில காரணங்களை வரிசைப் படுத்தியதில் பல காரணங்கள் மிகையானவை என தான் எண்ணுவதாகக் குறிப்பிட்டார்.  

பிறகு தன் உத்யோக வெற்றியின் காரணம் என்னவாக இருக்கும் என்று தான் நினைப் பதை விளக்கினார். 

                  “அந்தரங்க ஸுத்தி என்பது பொதுப் பணி புரியும் ஒவ்வொருவருக்கும் மிகமிக அவசியம்.  கண்டவற்றை, கேட்டவற்றை, படித்தவற்றை எல்லாவற்றையும் ஆராய்ந்து ஒரு தீர்க்கமான முடிவெடுக்க, அந்தரங்க ஸுத்தி தான் ஆதாரம்.  தனக்கு வேண்டியவர், வேண்டாதவர் என்ற விருப்பு வெறுப்பு இன்றி எந்த ஒரு விஷயத்தையும் எவ்வித முன் தீர்மானமும் இல்லாமல் அணுகினால் அதன் காரணமாகக் கிடைக்கும் தீர்வு அப்பழுக்கு அற்றதாக இருக்கும்.  தன்னிச்சைப்படி காரியங்களை முடித்துக் கொள்ள முயற்சி செய்யாது, எது நியாயமோ அதை அரும்பாடுபட்டாவது கண்டு பிடித்து அதன் வழி நடப்பதே சத்தியம்.  தனது பணி என்ன, அதை எங்கே, எப்படி ஆரம்பித்து, எப்படி முடிப்பது என அறிந்து நியாயம் ஒன்றே குறிக்கோள் என்று செயல் பட்டால், எந்த விதத் தவறும் எந்தக் கணத்திலும் நடக்காது, அதற்கு என் உத்யோக வாழ்க்கையே எடுத்துக் காட்டு” என்று குறிப்பிட்டார்.  

                 கடமையாற்றும்போது குறுக்கே வரும் ஆசைகளை, பேராசைகளையெல்லாம் ஒதுக்கிவிட்டு சரியானவைகளையே செய்யும் வெறியுடன் செயல்பட வேண்டும் என்று அவர் ஆணித்தரமாக சொன்னபோது அவர் பேச்சின் தீவிரம், சத்தியம், உண்மை அங்கு கூடியிருந்தவர்களது அந்தரங்களை வெகுவாகத் தொட்டது.  

                தனக்கு அளிக்கப்பட்டுள்ள பண முடிச்சை Staff Benevolent Fundக்கு அப்படியே அளிப்பதாக அறிவித்து அந்த செக்கை endorse செய்து அதற்குரிய அதிகாரியிடம் அதை சேர்ப்பித்து தன் உரையை முடித்துக் கொண்டார்.

அவரது பேச்சு ஏற்படுத்திய பிரமிப்பலிருந்து விடுபட்ட ஊழியர்கள் கிருஷ்ணசாமி வாழ்க! வாழ்க! என்று நெஞ்சுருகி வாழ்த்தினர்.

                 ஒரு அரை மணி நேரம் மேடையிலேயே அமர்ந்திருந்து தன்னை வாழ்த்த வந்தவர் களையெல்லாம் சந்தித்து நன்றி கூறி விட்டு சுமார் 10 மணி அளவில் வீடு திரும்பினார்.

               இரவு 10.30 மணிக்கு காலிங் பெல் அடிப்பது கேட்டு, வந்தது யாராக இருக்கும் என்ற பரபரப்புடன் மாடியிலிருந்து ஹாலை நோக்கி வந்த கிருஷ்ணசாமிக்கு, ஹாலில் அன்னியச் செலாவணி ஜெனரல் மேனேஜரும், இரண்டாவது உயர் அதிகாரியும் காத்திருப்பது மிக்க வியப்பை அளித்தது.

               அயல் நாடுகளில் நிறுவப்படும் அன்னியச் செலவாணி கம்பெனியில் பணி புரிவதற்கான தேர்வின் முடிவுகளை நாளையே தாங்கள் அறிவிக்க விரும்புவதாக அவர்கள் அறிவித்தது, கிருஷ்ணசாமிக்கு ஓர் ஆனந்த அதிர்ச்சியைத் தந்தது.  நாளை காலை 11 மணிக்கு அதை ஆபிஸில் முடிவு செய்து கொள்ளலாம் என்று கூறி அவர்களை அனுப்பிவிட்டு படுக்கையில் படுத்த போது கிருஷ்ணசாமி மிக்க மன நிறைவடைந்தார்.  

              கிருஷ்ணசாமி நினைத்தது போல் அவர்கள் நல்லெண்ணத்துடன் ஒன்றும் வரவில்லை.  பதவி ஓய்வு பெறுவதற்கு முன் எப்படியும், கிருஷ்ணசாமி வெளி நாட்டிற்கு ஆபிஸர்களை அனுப்புவதற்கான லிஸ்டைப் பற்றி பிரஸ்தாபிப்பார் என்று அவர்கள் நன்கு அறிவர்.  அதை சமாளிக்க ஒரு திட்டம் தீட்டியிருந்தனர்.  

             அவர்களுக்கு எப்படியோ கிருஷ்ணசாமிக்கு டெல்லியிலிருந்து அளிக்கப்பட வேண்டியிருந்த பதவி பற்றிய விவரம் எட்டியிருந்தது.  அரசாங்க அதிகாரியின் உறவினரை லிஸ்டில் சேர்த்தால் தான் அந்த சேர்மன் பதவி இவருக்கு என்ற விவரமும் அவர்கள் அறிவர்.  அந்த விஷயத்தை வைத்து கிருஷ்ணசாமியை தங்களது எண்ணங் களுக்கு பணிய வைக்க ஒரு திட்டம் தீட்டியிருந்தனர்.  அதாவது 20 நபர்களுக்கான லிஸ்டின் முதல் 19 இடங்களை Merit Orderன் படி பூர்த்தி செய்து விட்டு, 20 வது இடத்தை மட்டும் கிருஷ்ணசாமியின் இச்சைக்கு விட்டுவிட வேண்டியது.  ஒரு வேளை கிருஷ்ண சாமி அந்த 20 வது இடத்தை டெல்லி அதிகாரியின் உறவினருக்கு  கொடுப்பாரேயானால் பிறகு அவரை கட்டாயப்படுத்தி தங்களுக்கு வேண்டியபடி லிஸ்டை மாற்றிக் கொள்வது என்று முடிவு செய்திருந்தினர்.  மறு நாள் கிருஷ்ணசாமிக்கு சத்திய சோதனை ஒன்று நிர்ணயிக்கப்பட்டிருந்தது.  

            இந்த விஷயங்களையெல்லாம் அறியாத கிருஷ்ணசாமி தனது கீழ் அதிகாரிகளின் திடீர் இரவு விஷயத்தைப்  பற்றி வியந்தவாறே மறு நாள் காலை அலுவலகத்தை நோக்கி நடந்தார். அவர் இருக்கையில் அமர்ந்த ஐந்து நிமிடங்களுக்கெல்லாம், அந்த லிஸ்டுடன் கிருஷ்ணசாமியின் அறைக்கு வந்தனர்.  லிஸ்டை சமர்ப்பித்தனர்.  20 பேர்கள் இருக்க வேண்டிய லிஸ்டில் 19 பேர்கள் தான் இருப்பது குறித்து, கிருஷ்ணசாமி அவர்களிடம் வினவியபோது, அவர்கள் அசட்டுச் சிரிப்புடன், டெல்லி உயர் அதிகாரியின் உறவினர் பெயரைச் சொல்லி, சேர்மன் விரும்பினால், அந்தப் பெயரை 20 வது பெயராக சேர்த்துக் கொள்ளலாம் என முன் மொழிந்தனர்.  அடி வயிற்றிலிருந்து வந்த சினத்தை கஷ்டப்பட்டுக் கொண்டு அடக்கிக் கொண்டு, பஸ்ஸரை அழுத்தி பியூன் மூலம் இண்டர்வியூ லிஸ்ட் அடங்கிய பைலை எடுத்து வர ஆணையிட்டார். 

           அந்த பைலில் இருந்த Merit Order லிஸ்டின் படி முதல் 19 பெயர்கள் அந்த அதிகாரிகள் கொடுத்த லிஸ்டில் சரிவர இடம் பெற்றுள்ளதா என உறுதி செய்து கொண்டு, Merit order ல் இருபதாவதாக இடம் பெற்ற ஊழியரின் பெயரை அந்த லிஸ்டில் தன் கையாலேயே பூர்த்தி செய்து, லிஸ்டை அங்கீகரித்து கையெழுத்திட்டார். 

           திரு கிருஷ்ணசாமியின் அந்தரங்க ஸுத்தியின் ஒளியில் அந்த இருபது ஊழியர் களின் எதிர்காலம் பிரகாசித்தது.

--பார்த்தசாரதி

தனி ஒருவன் -பகுதி 2

இவரது வங்கியின் சார்பாக அன்னியச் செலாவணி கம்பெனிகள் சிலவற்றை நியூயார்க், சவுதி அரேபியா, ஹாங்காங் போன்ற சில இடங்களில் நிறுவுவதென மூன்று மாதங்களுக்கு முன் தீர்மானிக்கப்பட்டது.  இந்தப் பணிக்காக அந்த வங்கியில் பணிபுரியும் 20 ஊழியர் களைத் தேர்ந்தெடுத்து வெளி நாட்டுக்கு அனுப்புவது என்பதும்  ஏற்கனவே தீர்மானிக் கப்பட்ட விஷயம்.  இதற்கான விதிமுறைகளெல்லாம் விவரமாக வகுக்கப்பட்டு நேர்முகத் தேர்வும் நடந்தாகிவிட்டது. நிரப்பப்படவேண்டிய  20 இடங்களுக்கு 500 ஊழியர்கள் போட்டி. 

                 கிருஷ்ணசாமி விட்டுச்செல்லும் இடத்திற்கு அடுத்தபடியாக சேர்மனை அரசாங்கம் நியமிக்கும் வரை தற்காலிமாக சேர்மனாக பணி புரிய இருக்கும் தற்போது வங்கியின் இரண்டாவது இடத்தை வகிக்கும் அதிகாரியின் தம்பி மகனும், வங்கியின் அன்னியச் செலாவணி பிரிவினது ஜெனரல் மேனேஜரின் அண்ணன் மகள் இந்த நேர்முகத் தேர்வினை மேற்கொண்டுள்ள 500 ஊழியர்களில் அடக்கம்.



                கிருஷ்ணசாமியின் பதவி விலகலுக்குப் பிற்கு அடுத்த சேர்மன் நியமிக்கப் படுவதற்கு இருக்கப் போகும் இடைவெளியில் தங்கள் இஷ்டம் போல இந்த 20 இடங்களைப் பூர்த்தி செய்து கொள்ளலாம் என்று மேற்கண்ட இரு அதிகாரிகள் சதி செய்வதாக ஒரு நம்பகமான வதந்தி ஏற்கனவே பரவ ஆரம்பித்து விட்டது.            



  இது இப்படி இருக்கையில் சென்ற வாரம் கிருஷ்ணசாமிக்கு ஒரு முக்கியமான போன்கால் வந்தது. அகில இந்திய வங்கி ஊழியர்களது வேலை முறைகளைப் பற்றி ஆழ்ந்து ஆராய்ந்து அதில் தற்போது நிலவி வரும் சீர்கேடுகளைக் களைய யோசனைகளை பரிந்துரைக்கும் பொருட்டு, அரசாங்கம் கமிட்டி ஒன்றினை ஒரு வருட கால வரம்புடன் நிறுவப் போவதா கவும், கிருஷ்ணசாமியின் திறமை மிக்க தொழிலாளர் நிர்வாக அனுபவம் காரணமாக, அந்த கமிட்டியின் சேர்மனாகப் பணியாற்ற அவரது சம்மதத்தை அறிந்து கொள்ளும்  பொருட்டு அவரை அரசாங்க அதிகாரி ஒருவர் தொலைபேசி மூலம் அணுகினார்.  கிருஷ்ணசாமி தன் சம்மதத்தைத் தெரிவிக்க இரண்டு நாட்கள் அவகாசம் கேட்டிருந்தார்.



                 வங்கி ஊழிய நிர்வாக விஷயங்களை கரைத்துக் குடித்தவர் கிருஷ்ணசாமி.  ஊழியர் நிர்வாகத் துறையில் உள்ள முறைகேடுகள் சரிசெய்ய வெகுவாக பாடுபடுபவர்.   அதைப் பற்றி ஆழ்ந்து ஆராய்ந்து தனது பரிந்துரைகளை அளிப்பதற்கு ஒரு சந்தர்ப்பம் கிடைக்கப் போகிறதே என்று அவருக்கு மட்டற்ற மகிழ்ச்சி. மேலும் ஓய்வு காலத்தின் முதலாண்டில் கூட தனது வங்கிப் பணியினைத் தொடரலாமே என்று நினைத்து சந்தோஷப் பட்டார்.


              இரண்டு நாட்களுக்குப் பிறகு, தன் பரிபூரண சம்மதத்தை தொலைபேசி மூலம் அறிவித்தார்.  2 மணி நேரங்களுக்குப் பிறகு, அந்த விஷயம் பற்றி கடைசியாக தீர்மானிக்க வேண்டிய டெல்லி உயர் அதிகாரியின் அந்தரங்கச் செயலரிடமிருந்து கிருஷ்ணசாமிக்கு வந்த தொலைபேசி செய்தி அவரை திகைப்பில் ஆழ்த்தியது.


             கமிட்டியின் சேர்மன் இடத்திற்கு இரண்டு மூன்று பேர் போட்டியிடுவதாகவும், கிருஷ்ணசாமிக்கு அந்த பதவி கிடைக்க வேண்டுமெனில், அவர் டெல்லி அதிகாரிக்கு ஒரு சிறு உதவி செய்ய வேண்டும் என்றும் அந்த செய்தி அறிவித்ததது.டெல்லி உயர் அதிகாரி யின் உறவினர் ஒருவர் கிருஷ்ணசாமியின் வங்கியில் பணி புரிவதாகவும், அவர் வெளி நாட்டுக்கு அனுப்புவதற்கான நேர்முகத் தேர்வை மேற்கொண்டுள்ள 500 பேர்களில் ஒருவர் எனவும், கிருஷ்ணசாமி எப்படியாவது இந்த ஊழியரை தேர்வு செய்யப் போகிற 20 நபர்கள் அடங்கிய லிஸ்டில் சேர்ப்பாரேயானால், கமிட்டியின் சேர்மன் பதவி கிருஷ்ண சாமிக்குத் தான் நிச்சயம் என அறுதியிட்டது அந்தரங்கக் காரியதரிசியின் குரல்.  இந்தச் செய்தியை தெரிவித்த பிறகு கிருஷ்ணசாமியின் பதிலுக்குக் கூட காத்திராமல் அந்தக் குரல் ரிஸீவரை வைத்து விட்டது.  மறுபடியும் அதே குரல் போன் செய்து தேர்ந்தெடுக்கப் பட வேண்டிய நபரின் முழு விவரங்களைக் கொடுத்தது.  இந்த விஷயத்தைப் பற்றி முடிவு அறிவிக்கப்பட்ட பிறகு தான் கிருஷ்ணசாமியின் சேர்மன் பதவி பற்றிய முடிவு எடுக்கப்படும் என்று கறாராக அந்தக் குரல் அறிவித்தது. 

       

  இந்த விஷயம் கிருஷ்ணசாமியை தர்ம சங்கடமான நிலைக்குத் தள்ளியது.  இப்போதே கிருஷ்ணசாமி மனது வைத்தால் தனது உடனடி கீழ் அதிகாரியை அழைத்து இதற்கான ஆணையினை பிற்ப்பிக்கலாம்.  கீழ் அதிகாரியையும், அன்னியச் செலாவணி ஜெனரல் மேனேஜரையும் திருப்திப் படுத்துவது மிக எளிது.  அவர்களிருவரும் ஏற்கனவே தங்கள் உற்வினர்களை லிஸ்டில் சேர்க்க திட்டமிட்டிருப்பது கிருஷ்ணசாமி அறிந்ததே.


           அன்று காலை ஆபிஸ் வரும்போது இந்த விஷயம் பற்றிய சிந்தனை தலை தூக்கியது.  அந்த சிந்தனையை மனத்திலிருந்து அகற்றிக் கொண்டு வேறு பல நல்ல விஷயங்களைப் பற்றி வலுக்கட்டாயமாக யோசித்து நினைவை திசை திருப்பினார்.


           கிருஷ்ணசாமியைச் சந்திப்பதற்காகவும், அன்று மாலையில் நடைபெறும் பிரிவு உபசாரக் கூட்டத்தில் பங்கேற்கவும் பல ஊர்களிலிருந்து ஊழியர்கள் திரள் திரளாக வந்திருந்தினர். அவர்கள் எல்லோரையும் தன் அறையிலேயே சந்தித்து அளவளாவினார்.  அன்று முழுவதும் அதற்கே சரியாக இருந்தது.  ஏற்கனவே திட்டமிட்டு எல்லா முக்கியப்  பணிகளையும் முடித்து விட்டபடியால் அலுவல் தொந்தரவு அதிகம் இல்லாமல் ஊழியர் களிடம் பேசிக்கொண்டிருப்பதிலேயே எல்லா நேரத்தையும் கழித்தார்.


         அன்று மாலை 6 மணிக்கு விழா.  விழாவிற்கு மனைவியையும் அழைத்துக் கொண்டு வர வேண்டும் என விழாக் குழுவின் உறுப்பினர்கள் கிருஷ்ணசாமியை கேட்டுக் கொண்டனர்.  அவரும் சம்மதித்தார்.  ஊழியர்களிடம் பேசும்போது நிதி திரட்டும் விஷயம் எதேச்சையாக கிருஷ்ணசாமிக்குத் தெரிய வந்தது.  ஆனால் விழாக்குழுவின் உறுப்பினர் களிடத்தில் அதைப் பற்றி அவர் ஒன்றும் சொல்லவில்லை.


         சுமார் 6 மணி அளவில் விழா நடைபெறும் இடம் காருகுறிச்சி அருணாசலத்தின் நாதஸ்வரத்தில் கரைந்து கொண்டிருந்தது.  கிருஷ்ணசாமி கர்நாடக சங்கீதப் பிரியர் என்பதை எல்லா ஊழியர்களும் அறிந்திருந்த படியால் அன்று அந்த ஒலிபெருக்கி இசையை அவர்கள் வெகுவாக ரசித்தனர்.  விழா மேடை எளியமுறையில் அழகாக அலங்கரிக் கப்பட்டிருந்தது.   சுமார் 5000 பேர் கொண்ட பெரும் கூட்டம் கண்டு அங்கு எல்லோரும் வியந்தனர்.


        சரியாக 6 மணிக்கு கிருஷ்ணசாமி தன் மனைவியுடன் காரில் வந்து இறங்கினார்.  கரகோஷம் வானைப் பிளந்தது.  விழாக் கமிட்டியின் செயலர் அவரை மேடைக்கு அழைத்துச் சென்றார்.  மேடையில் 7 இருக்கைகள் போடப்பட்டிருந்தன.  கிருஷ்ணசாமியும் அவர் மனைவியும் நடு இடங்களை அலங்கரித்தனர்.  மற்ற ஐந்து இருக்கைகளை வங்கியின் உயர் அதிகாரிகள் மற்றும் விழா கமிட்டியின் செயலர் நிரப்பினர்.

               
வாடிக்கையாளர்களில் சிலர், ஊழியர்களில் பலர், கிருஷ்ணசாமி அவர்கள் முப்பது ஆண்டுகளுக்கு மேல் ஆற்றிய பணியினை ஓங்கி உலகளந்தனர்.


                 கிருஷ்ணசாமிக்குப் பிறகு தற்காலிமாக சேர்மன் பதவி ஏற்கும் உயர் அதிகாரி தான் அன்று சிறப்பும் பேச்சாளர்.  அவர் உண்மையிலேயே மனம் நெகிழ்ந்து போய், வார்த்தைகள் கிடைக்காமல் தடுமாறி, கிருஷ்ணசாமியின் அரும் பணிக்கு அஞ்சலி செய்தார். அடுத்தது கிருஷ்ணசாமியின் பிரிவு உபசார உரை.  அதற்கு முன் விழாக் கமிட்டியின் செயலர் ஓடி வந்து ஒரு லட்சத்திற்கான செக்கை வங்கியின் இரண்டாவது உயர் அதிகாரி மூலம் கிருஷ்ணசாமியிடம் சேர்ப்பித்தார். 


என்ன விபரீதம் நடக்கப் போகிறதோ என்று திகிலுடன் எல்லோரும் ஆவலான எதிர்பார்ப் புடன் காத்துக் கொண்டிருந்தனர்!

--தொடரும்
            

ஒரு வங்கிக் காசாளரும்,வாடிக்கையாளரும்!

(நேற்றைய பதிவின் நீட்சி)

ஒரு வங்கியின் கிளை.

உணவு இடைவேளைக்கு இன்னும் ஐந்து மணித்துளிகளே பாக்கி உள்ளன.

தனது கூண்டுக்குள் அமர்ந்திருக்கும் காசாளர்,தன் கைக்கடிகாரத்தை பார்க்கிறார், சாப்பிடப்போவதற்காக.

அன்று காலை அவருக்கும் அவர் மனைவிக்கும் சண்டை.ஒரு சின்ன விஷயத்தில் தொடங்கி வெடித்து விட்டது.

மனைவியிடம் கோபித்துக்கொண்டு,”உன் சோத்தை நீயே கொட்டிக்கோ” என்று இரைந்து விட்டு,அலுவலகம்  வந்து விட்டார்.

நேரமாகி விட்ட படியால் எங்கும் சாப்பிடவுமில்லை.

காலையிலிருந்து மூன்று குழம்பி குடித்து வயிறே குழம்பிப் போயிருந்தது.

இப்போது உணவகம் சென்று ஒரு பிடி பிடிக்க வேண்டும்.

இடைவேளைக்காகக் காத்துக் கொண்டிருக்கிறார்.

(இங்கு ஷாட்டைக் கட் செய்கிறோம்----அடுத்த ஷாட்--)

அந்தக் கிளையின் வாடிக்கையாளர் ஒருவர்.அன்றாட உபயோகப் பொருள்கள் தயாரிக்கும் ஒரு நிறுவனத்தின் மொத்தக் கொள்முதலாளர்.

ஒரு தவணை உண்டியலுக்குப்( usance bill) பணம் கட்ட இன்று கடைசி நாள்.

இன்று கட்டவில்லை என்றால் அவரது முகவாண்மை ரத்தாகி விடும்.

பெரிய இழப்பாகி விடும்.

காலை முதல் அலைந்து திரிந்து தேவையான பணத்தைச் சேர்த்து விட்டார்.

இப்போது வங்கியில் பணம் செலுத்த வேண்டும்.

(ஷாட் கட்-அடுத்த ஷாட்!)

அவர் வங்கியில் நுழையும்போது உணவு இடை வேளைக்கு 5 மணித் துளிகளே பாக்கி!

காசாளரின் கூண்டை அடைந்து பையிலிருந்து பணத்தை எடுக்கிறார்.10,20 50 100 என எல்லா விதமான நோட்டுக்களும் இருக்கின்றன.

காசாளர் கோபமாகச் சொல்கிறார்”.மூடும் நேரம்.பில்லுக்கெல்லாம் சின்ன நோட்டெல்லாம் வாங்க முடியாது.500,1000 இருந்தால் கொடுங்கள்.வாங்கிக் கொள்கிறேன்.”அவருக்குப் பசி வயிற்றை கிள்ளுகிறது.

வாடிக்கையாளர் காலை முதல் மிகச் சிரமப்பட்டுப் பணத்தைச் சேர்த்திருக்கிறார் .இன்று கட்டா விட்டால் வியாபாரமே போய்விடும் எனும் நிலை.

“அதெப்படி  சின்ன நோட்டு வாங்க மாட்டேன்னு நீங்க சொல்ல முடியும்.நான் நேரம் முடியுமுன் வந்து விட்டேன்.நீங்க வாங்கித்தான் ஆகணும்” எனச் சொல்கிறார்.

காசாளர்  சொல்கிறார்” நான் சொன்னாச் சொன்னதுதான்.வாங்க முடியாது”

வார்த்தை தடிக்கிறது.

காசாளர்  முகப்பை மூடிவிட்டு உணவுக்குப் புறப்படுகிறார்.

வாடிக்கையாளர் மேலாளரைப் பார்த்துப் புகார் செய்யப் போகிறார்.

முடிவு எப்படியிருக்கும்?

இதைத் தவிர்த்திருக்க முடியாதா?

முடியும். எப்படி?

காசாளர்;”சார்.சாப்பிடும் நேரம் வந்து விட்டது.இதை வாங்கினால் எண்ணி முடிக்க நேரமாகும்.கொஞ்சம் காத்திருங்கள்.நான் சாப்பிட்டு விட்டு வந்து வாங்கிக் கொள்கிறேன்.  நீங்கள் இன்னும் சாப்பிடவில்லையென்றால் வாருங்களேன் இருவரும் போய்ச் சாப்பிட்டு விட்டு வந்து விடலாம்.”

(அல்லது)

வாடிக்கையாளர்: காசாளரை நெருங்கியதும்”சாரி,சார் பணம் சேகரிக்க நேரமாகி விட்டது.கடைசி நாள்.நீங்கள் சோர்ந்திருக்கிறீர்கள் .நீங்கள் போய்ச் சாப்பிட்டு விட்டு வாருங்கள். நான் காத்திருக்கிறேன். இல்லையெனில் இருவரும் சேர்ந்து வெளியில் போய்ச் சாப்பிட்டு விட்டு வரலாம்”

முடியாதா?

முடியும்.

நமது பிரச்சினையில் ஒன்றிப்போகாமல் மற்றவர்க்கும் பிரச்சினை இருக்கும் என்பதை உணர்ந்து செயல்பட்டால்!